Sögusviðið skáldsögunnar Dauðinn og mörgæsin er Úkraína eftir að Sovétríkin hafa liðast í sundur. Viktor, lánlaus og hæglátur rithöfundur, býr í lítilli blokkaríbúð ásamt þunglyndri mörgæs sem hann hefur tekið í fóstur af fjárvana dýragarði Kíev.Einn daginn er hann ráðinn í lausamennsku við eitt dagblað borgarinnar til að skrifa minningargreinar um mikilsháttar menn í samfélaginu sem blaðið vill hafa til taks þegar viðkomandi hrekkur upp af. Skyndilega virðist veröldin brosa við Viktori. En eftir því sem dagarnir líða verður heimilislíf hans stöðugt flóknara auk þess sem starf hans á blaðinu hefur ýmsar miður heppilegar afleiðingar í för með sér.

Í þessari bráðskemmtilegu og tregafullu skáldsögu fjallar höfundur um fjarstæðukenndan veruleika hversdagsfólks í löndum Austur-Evrópu eftir fall járntjaldsins. Sagan hefur verið þýdd á fjölda tungumála á síðustu misserum og alls staðar fengið rífandi góða dóma.

Höfundur: Andrej Kúrkov

Þýðandi: Áslaug Agnarsdóttir.

Kaupa bók (á vef Bóksölu stúdenta)