Þegar Raymond Carver lést árið 1988, aðeins fimmtugur að aldri, hafði hann á skömmum tíma skipað sér í hóp fremstu smásagnahöfunda samtímans. Ekki er nóg með að hann skapaði sinn einstaka stíl heldur hafa verk hans haft afgerandi áhrif á þróun smásagnaformsins á síðari árum.

Sendiferðin hefur að geyma þær sjö smásögur sem Carver lét eftir sig þegar hann lést. Líkt og í fyrri verkum sínum bregður hann upp myndleiftrum úr lífi hversdagsfólks í Bandaríkjunum, atvikum sem láta lítið yfir sér en skilja þó
eftir sig djúp spor. Persónur Carvers lifa í heimi þar sem hamingjan kemur ekki innpökkuð í neytendaumbúðir ­ ef hún kemur á annað borð. Titilsaga safnsins, sem fjallar um dauðastríð Antons Tsjekov, er að margra mati ein besta saga Carvers en hún var skrifuð á þeim tíma þegar höfundurinn barðist sjálfur sinni vonlausu baráttu við krabbamein. Þýðandi: Óskar Árni Óskarsson.

"Sögur þessar eru verðugur minnisvarði um Carver og gerir þýðandi sérkennilegum stílbörgðum og tóntegund hans afar góð skil." (Björn Þór Vilhjálmsson, Lesbók Morgunblaðsins)

Kaupa bók (á vef Bóksölu stúdenta)